Esat Bushati, 93 – vjeçari legjendar i futbollit shkodran

Të përmbledhësh jetën sportive të një sportisti duhet të matesh shumë, e aq më tepër kur ai person është nga ato që kanë lënë gjurmë në futbollin shqiptar.

Para pak ditësh ai festoi 93 – vjetorin e lindjes së tij. Bëhet fjalë për zotninë e nderuar Esat Bushatin, i cili u lind në Shkoder , më date 03.05.1929 , në derën e madhe e të respektuar të Bushatlinjve të Shkodrës.

Në fillimin e futbollit e ndihmon shtatëlartësia e tij për pozicionin e qendërmbrojtësit që ai zgjedh për të luajtur. Hapat e parë i hedh në skuadren e lagjes Rus, në bahçen e Qukejve. Spikatet nga shokët e skuadres dhe merret në ekipin e ‘’Xhamisë Plakë’’ , në fillim të vitit 1946. Në fillim të vitin 1947 kalon në ekipin e ‘’Gjimnazit të Shkodrës’’ , përsëri në kampionatin  e lagjeve, i cili kishte mjaft rëndësi në promovimin dhe zhvillimin e futbollistëve të asaj kohe. Pas ecurisë pozitive me ekipet e lagjeve, në vitin 1948 , në moshen 19 vjeçare e merr ekipi i Vllaznisë. Vetëm pas një viti arrin të fitojë vendin e titullarit në formacion, duke marrë ‘’bekimin’’ e lojtarit që do ti zinte vendin, figurës mjaft të shquar të futbollit shkodran dhe shqiptar z. Muhamet Dibra. Kjo ‘’Vllazni’’ vinte pas fitimit të kampionatit kombëtar të viteve 1945 dhe 1946 me lojtarë me shumë cilësi në organikë.

Në vitin 1949 spikatet nga ‘’Partizani’’, i cili me çdo kusht e do në ekipin e tij. Aty zotni Esat Bushati shfaq formë shumë të mirë sportive , duke luajtur deri në vitin 1954 me emra shumë të mëdhenj si Loro Boriçi, Refik Resmja e shumë të tjerë.

Nga ‘’Partizani’’ kalon përsëri në Shkodër, ku luan deri në vitin 1960. Pas dy titujve të fituar me skuadren e ‘’Partizanit’’ në vitet 1949 dhe 1954, arrin të ndajë eksperiencën e tij me lojtarët e ‘’Vllaznisë’’.

Në nder të tij, Shkodra Sport Event ka organizuar më datë 05 Maj 2019 kupën ‘’Esat Bushati’’ me një shtrirje të gjërë të ekipeve nga Shkodra.

Video nga kupa ”Esat Bushati” : https://www.youtube.com/watch?v=ab9t8YBkEzU&list=UU5VxB9r9arNNtfLlYfzjZtQ&index=27

Në ditët në vijim pritet të publikohet dokumentari me video për jeten sportive të zotnisë së tij, në emisionin ‘’Retro Sport’’ , nga Shkodra Sport Event.

Urimi jonë për ‘’Mjeshtrin e Sportit’’ z.Bushati nuk është ai tradicionali, por ne i urojmë jetë të gjatë dhe të lumtur!